Azərbaycan Respublikası Elm və Təhsil Nazirliyinin akademik Əli Quliyev adına Aşqarlar Kimyası İnstitutunda Azərbaycanın kimyaçı alim akademiki Yusif Məmmədəliyevin anadan olmasının 120-ci ildönümünə həsr olunmuş tədbir keçirilib.
Tədbiri giriş sözü ilə institutun baş direktoru akademik Vaqif Fərzəliyev açaraq, Yusif Məmmədəliyevin həyat və yaradıcılığından, “Yusif Məmmədəliyev məktəbi”nin yaranmasından, görkəmli alimin elmin inkişafı naminə gördüyü işlərdən geniş məlumat verib. O, həmçinin qeyd edib ki: “Alimin dahiliyi onunla müəyyən olunur ki, elmi problemi aydın təsəvvür etsin və onun düzgün həlli yollarını müəyyən etsin. Akademik Yusif Məmmədəliyevin dahiliyi kimya elminin bir sıra istiqamətlərində öz təsdiqini tapmışdır. Onlardan biri də aşqarlar kimyası istiqamətidir. Sənayedə alınan ilk aşqarlar sürtkü yağlarının yalnız bir xassəsini yaxşılaşdırırdı. Sonralar artıq sürtkü yağlarının eyni zamanda bir neçə vacib istismar xassəsini yaxşılaşdıran çoxfunksiyalı aşqarlar yaradıldı. Aşqarların yaradılması və tətbiqində qazanılmış nailiyyətləri, həmçinin aşqarlar kimyasının fundamental məsələləri üzrə əldə edilən mühüm elmi nəticələri nəzərə alan SSRİ-nin görkəmli alimlərinin təklifi ilə 1965-ci ildə Azərbaycan Elmlər Akademiyası Neft-Kimya Prosesləri İnstitutunun «Aşqarların sintezi və texnologiyası” laboratoriyasının əsasında SSRİ-də ilk ixtisaslaşmış institut –Aşqarlar Kimyası İnstitutu (AEA AKİ) yaradıldı”.
Tədbir iştirakçıları bu böyük alimin kimya sahəsindəki işləri haqqında çıxışlar edibblər.
Sonda “ Akademik Yusif Məmmədəliyev -120” adlı videoçarx nümayiş olunub.
