25 noyabr 2025-ci il tarixində Azərbaycan Respublikası Elm və Təhsil Nazirliyinin akademik Əli Quliyev adına Aşqarlar Kimyası İnstitutunun (AKİ) Yeni Azərbaycan Partiyası (YAP) İlk Ərazi Təşkilatı, Azad Həmkarlar Təşkilatı və Gənc Alim və Mütəxəssislər Şurasının birgə təşkilatçılığı ilə “Qeyri-rəsmi məşğulluq, onun zərərləri və bununla mübarizə yolları” mövzusunda maarifləndirmə seminarı keçirilib.
İctimaiyyətlə əlaqələr şöbəsindən verilən məlumatda bildirilib ki, tədbiri giriş sözü ilə açan İnstitutun Azad Həmkarlar Təşkilatının sədri dosent Elxan İsakov tədbirin əhəmiyyətini vurğulayaraq qeyd edib ki, qeyri-formal məşğulluq insanların gələcəkdə sabit gəlir, sosial müdafiə və hüquqlarından məhrum edilmələrinə səbəb olur. Bu neqativ halların qarşısının alınması üçün əmək münasibətləri rəsmiləşdirilməli, sahibkarlıq və ya digər fəaliyyət qeydiyyata alınmalıdır.
Institutun laboratoriya müdiri kimya üzrə fəlsəfə doktoru, dosent Vəli Kazımov “Qeyri-rəsmi məşğulluq, onun zərərləri və bununla mübarizə yolları” mövzusunda çıxış edərək, qeyri –rəsmi məşğulluğun mənfi nəticələri barədə əlavə məlumat verib, işəgötürənlərin qeyri-rəsmi məşğulluğun qarşısının alınmasında səylərinin artırılmasının vacibliyini diqqətə çatdırıb. Məzuniyyət və istirahət hüququ barədə də iştirakçılar ətraflı məlumatlandırılıb.
Maarifləndirmə seminarı interaktiv müzakirələrlə davam edib
