Azərbaycan Respublikası Elm və Təhsil Nazirliyinin akademik Əli Quliyev adına Aşqarlar Kimyası İnstitutunun “Sürtkü kompozisiyaları ” laboratoriyasının müdiri, texnika elmləri doktoru, professor Cavadova Həqiqət ƏliƏşrəf qızının 85 yaşı tamam oldu. Yubileylə əlaqədar olaraq institutda Elmi Şuranın geniş iclası keçirilmişdir.
Tədbiri giriş sözü ilə açan institutun direktoru akademik Vaqif Fərzəliyev professor Həqiqət Cavadovanın elmi-tədqiqatlarının əsas istiqamətinin üzvi birləşmələrin sürtkü yağlarında aşqar kimi tədqiqi olduğundan və onların əsasında müxtəlif növ daxili yanma mühərrikləri üçün yeni sürtkü kompozisiyaları sahəsində apardığı elmi fəaliyyətindən, onun həmmüəllifliyi ilə Aşqarlar Kimyası İnstitutu tərəfindən bir sıra xüsusi təyinatlı sürtkü yağları yaradılması və istehsalının təşkil olunmasından, 2024-cü ildə Azərbaycan Respublikası Dövlət Mükafatına layiq görülməsindən danışmış, eyni zamanda yüksək ixtisaslı elmi kadrların hazırlanması sahəsində, institutun ictimai həyatında uğurlu fəaliyyətini də qeyd etmişdir. Onu institutun bütün əməkdaşları adından təbrik etmiş, ona uzun ömür, cansağlığı və elmi fəaliyyətində uğurlar arzulamışdır.
İnstitutun elmi katib baş elmi işçi M.Səfərova Həqiqət xanımın keçdiyi uğurlu həyat yolu haqqında geniş məruzə ilə çıxış etmişdir.
İnstitutun Azad Həmkarlar Təşkilatının sədri k.ü.f.d., dosent Elxan İsakov yubiliyara AHT-nın Fəxri Fərmanını təqdim edib və ona xoş arzularını bildirmişdir.
Daha sonra professor Əfsun Sucayev, baş elmi işçilər – Elmira Nağıyeva, Afayət Məmmədova, dosentlər – Nüsrət Əliyev, Mıziya Mirzoyeva, Xuraman Əfəndiyeva və başqaları professor Həqiqət Cavadovanı təbrik etmiş, ona ən xoş arzularını bildirmişlər.
