Azərbaycan Respublikası Elm və Təhsil Nazirliyinin akademik Əli Quliyev adına Aşqarlar Kimyası İnstitutunda Azərbaycan Milli Elmlər Akademiyasının yaranmasının 80 illik və Aşqarlar Kimyası İnstitutunun 60 illik yubileyi ilə əlaqədar tədbir keçirilib.
İnstitutun baş direktoru akademik Vaqif Fərzəliyev tədbiri giriş sözü ilə açaraq, Azərbaycan Milli Elmlər Akademiyasının və Aşqarlar Kimyası İnstitutunun yaranma tarixi, inkişaf yolu haqqında geniş məlumat verib.
Akademik Vaqif Fərzəliyev Azərbaycan Milli Elmlər Akademiyasının 80 illik yubileyində Prezident İlham Əliyevin çıxışında vurğuladığı məsələləri də diqqətə çatdırıb: “Prezident İlham Əliyevin toxunduğu əsas məsələlər, birincisi süni intelekt, ikincisi isə Azərbaycan dilinin inkişafı idı. Hər bir alim bu istiqamətdə çalışmalı və Azərbaycan elmini yüksəklərə qaldırmalıdır”.
Bundan başqa akademik institut alimlərinin üzərinə düşən vəzifələrdən danışıb, onları bu yubileylər münasibəti ilə təbrik edib, hər birinə uğurlar arzulayıb.
Tədbirdə Azərbaycan Respublikası Elm və Təhsil Nazirliyinin akademik Əli Quliyev adına Aşqarlar Kimyası İnstitutunun yaradılmasının 60 illik yubileyinə həsr olunmuş “Azərbaycan Respublikası Elm və Təhsil Nazirliyi Aşqarlar Kimyası İnstitutu – 60” kitabının təqdimatı da keçirilib.
Sonda Azərbaycan Milli Elmlər Akademiyasının yaranmasının 80 illik və Aşqarlar Kimyası İnstitutunun 60 illik yubileyinə həsr olunmuş videoçarx nümayiş olunub.









