Ənənəvi bitki mənşəli dərmanlar virus infeksiyaları üçün tamamlayıcı müalicə kimi geniş istifadə olunur. Bu amili nəzərə alaraq Bakı Dövlət Universiteti və Aşqarlar Kimyası İnstitutunun alimlərinin müştərək tədqiqatının nəticələri kimi biyan kökündə olan qlisirrizin birləşməsi müfəssəl tədqiq edilmiş, gəldikləri nəticələrə görə, bu birləşməni COVID-19 üçün potensial terapevtik vasitə olaraq təklif etmişlər.
Məlumatda deyilir ki, bu tədqiqat zamanı molekulyar dokinq simulyasiyasından istifadə edilmişdir. Bütün hesablamalar üçün sahəyə xas olan dokinq yanaşması tətbiq edilmişdir. Qlisirrizinin molekulyar dokinq tədqiqatları bu birləşmənin SARS-CoV-2 zülal hədəfləri ilə sabit bir kompleks əmələ gətirdiyini göstərmişdir. Əldə edilən nəticələrdən istifadə edərək, qlisirrizinin müəyyən edilmiş reseptorlarla bağlanması üçün farmakofor modelləri təklif olunmuşdu.
Nəticələr göstərir ki, qlisirrizin perspektivli antiviral namizəddir və COVID-19-un müalicəsi üçün əlavə tədqiqatların aparılmasını tələb edir.
Alimlərimizin beynəlxalq səviyyəli araşdırmalarının nəticələri Scopus bazasında indekslənən impakt faktoru 9.8 olan və Q1 klasifikasiyalı Biomaterials Translational jurnalında məqalə şəklində nəşr olunmuşdur (https://www.biomat-trans.com/journal/BMT/articles/online_first/220).
