Azərbaycan Respublikası Elm və Təhsil Nazirliyinin Kimya İnstitutu fəlsəfə doktoru proqramı üzrə doktoranturaya qəbul elan edir. İnstitutdan verilən məlumata görə, fəlsəfə doktoru proqramı üzrə doktoranturaya büdcə hesabına 7 ixtisas üzrə 21 plan yer nəzərdə tutulub. Belə ki, “Qeyri-üzvi kimya” üzrə 4 yer (3 əyani, 1 qiyabi), “Makromolekullar kimyası” üzrə 2 yer (1 əyani, 1 qiyabi), “Fiziki kimya” üzrə 3 yer (1 əyani, 2 qiyabi (1 məqsədli yer Sumqayıt Dövlət Universiteti üçün)), “Kimyəvi kinetika və kataliz” üzrə 4 yer (3 əyani, 1 qiyabi), “Kimya texnologiyası və mühəndisliyi” üzrə 3 yer (2 əyani, 1 qiyabi), “Üzvi kimya” üzrə 2 yer (1 əyani, 1 qiyabi) və “Neft kimyası” üzrə 3 yer (1 əyani, 2 qiyabi (1 məqsədli yer Sumqayıt Dövlət Universiteti üçün)) ayrılıb.
Doktoranturaya sənədlərin qəbulu mayın 19-dan iyunun 9-dək “Təhsil Mərkəzləşdirilmiş İnformasiya Sistemi” (TMİS) vasitəsilə elektron qaydada həyata keçiriləcək. Qəbul olmaq istəyən şəxslər https://portal.edu.az veb-səhifəsində qeydiyyatdan keçməli və tələb olunan sənədləri portala yükləməlidir.
Əlavə məlumat üçün Kimya İnstitutunun Elmi kadrların hazırlığı sektoruna müraciət etmək olar.